Vade etilgen Qırımdaki yaz lageri yerine Rusiye akimiyeti Qırımlı balalarnı Penzağa alıp ketti. Ana-babalarına bu aqta haber etilmedi, dep bildire "Sarı şerit".
"Bu adise Qırımda oraq ayınıñ soñunda oldı. Yarımadanıñ cenübiy yalısındaki lagerlerde yaz tatilini keçirmege söz berilgen Qırım mektep talebelerini, yerler olmağanından sebep, soñki ande Rusiyeniñ Penza vilâyetine yolladılar", — dep aytıla haberde.
Faallerniñ qayd etkenine köre, ana-babalar balaları evden biñler kilometr uzaqlığında olğanını soñra bilgenler.
"Bunıñ sebebi, Rusiye Federatsiyasınıñ depressiv regionlarında iç turizmniñ eksilmesidir. Soñki yılları ilk sefer degil ki, işğalciler anda vaqtınca işğal etilgen topraqlardan mektep talebelerini alıp keteler", — dep yaza "Sarı şerit".
Muarririyet bu malümatnı mustaqil olaraq teşkerip olamay.
