Rusiye tarafından mahküm etilgen qırımlı Mecit Abdurahmanov endi 11 aydan berli Çuvaşiya Cumhuriyetiniñ Tsivilsk şeerindeki 9-nci tüzetüv cezahanesiniñ rejim binasında buluna. Bu aqta onıñ qadını Elmira Abdurahmanova bildirdi, dep haber ete "Qırım birdemligi".
"Zezahanege tüşkeninden berli Mecit barakta bir kün bile oturmadı. Bütün bu vaqıt devamında onı ya ŞİZO-da, ya da kamera tipindeki bir odada tutalar, — dep tarif etti o.
Sıñırlavlar sebebinden qırımlı endi eki yıldan berli qorantasınen körüşip olamay. "Soñki bir qaç ay devamında biz esabına qoyğan paranı bile qullanmağa izin bermeyler. Ne körüşmege, ne de telefon etmege izin bereler, tek mektüpler vastasınen qonuşamız. Soñki kere o, Saratovda olğanda körüşken edi, eki yıl evelsi", — dedi Abdurahmanova.
Bundan da ğayrı, apishaneniñ memuriyeti tibbiy yardım istep bergen bütün muracaatlarını red ete, tuvğanları yollağan ilâclarnı qullanmağa izin bermey.
Cezahanede Abdurahmanovnıñ sağlıq vaziyeti fenalaştı: bedeninde ve yüzünde lekeler peyda oldı, aşqazan ülseri keskinleşti, tişleri ufanıp kete, devamlı baş ağrısı ve yüksek qan basımı raatsızlay. Qırımlınıñ ömür arqadaşı aytqanı kibi, cezahane yanında feldşer ve ekim oña iç bir yardım köstermeyler
Qorantası siyasiy mabüske kerekli vitaminler ve ilâclar ile paket yollağan, amma koloniyada oña ilâclarnı bermegenler, soñra feldşer vastasınen bereceklerini aytqanlar.
2019 senesi saban ayınıñ 27-nde Qırımda FSB, Rusiye İç işler nazirligi ve Rosgvardiya hadimleri qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdiler. 2019 senesi saban ayınıñ 27 ve 28-nde Aqmescitniñ Rusiye rayon mahkemesi bütün tutulğanlarnı apiske aldı. Yazda bu dava boyunca yaqalanğanlarnıñ sayısı 25 insanğa arttı.
25 qırımtatar cemaat faali — Ruslan Suleymanov, Alim Karimov, Rustem Şeyhaliyev, Mecit Abdurahmanov, Yaşar Müedinov, Bilâl Adilov, Cemil Gafarov, Riza İzetov, İzet Abdullayev, Asan Yanikov, Şaban Ümerov, Tofik Abdülgaziyev, Seytveli Seytabdiyev, Rustem Seythalilov, Akim Bekirov, Farhod Bazarov, Servet Gaziyev, Seyran Murtaza, Erfan Osmanov, Osman Arifmetov, Remzi Bekirov, Eskender Suleymanov, Enver Ametov, Vlâden Abdulkadırov ve Raim Ayvazov — Rusiyede teroristik olaraq tanılğan, amma bir çoq memleketniñ qanunlarında sıñırlanmağan islâm siyasiy partiyası "Hizb ut-Tahrir" ile alâqası olğanında qabaatlanalar.
"Memorial" aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs olaraq tanıdı
