İşğal etilgen Qırımda Rusiye pravoslav kilsesi balalar ve gençlerge tesirini arttıra, tasil ve diniy tedbirlerni askeriyleştirüv aleti olaraq qullana. Hususan, "Artek" bala merkezinde Rusiye pravoslav kilsesiniñ temsilcileri balalarğa silâ qullanmaqnı ögretken öz skaut teşkilâtını taqdim ettiler, dep haber ete Dezinformatsiyağa qarşılıq Merkezi.
Haberge köre, Rusiye pravoslav kilsesi "Artek"te "Tamırlar" gençler forumını teşkil etti, mında Rusiyeniñ diniy akademiyaları ve seminariyalarınıñ 160 talebesi iştirak etti. Mında "Pravoslav izciler qardaşlığınıñ" faaliyetini taqdim ettiler.
Merkezniñ malümatına köre, bu teşkilât balalarğa tek temel skautlıq becerilerini degil de, silâ qullanuvını da ögrete. Onıñ forması sıq-sıq arbiy şeklinde, ritorikası ise açıqtan-açıq cenk ile bağlıdır.
Balalarğa "cihad", "zayıflarnı qorçalamaq" ve "vatanğa hızmet etüv" silâlı küreşnen bağlı olğanını ögreteler. Merkezde qayd etkenlerine köre, Kreml, "terbiye ve maneviy qıymetleri" adı altında Rusiye pravoslav kilsesi vastasınen balalarnı Kreml rejimine hızmet etmege azırlay.
Daa evel Ukrayina prezidenti Volodımır Zelenskıy işğal etilgen Qırım territoriyasında yerleşken "Artek" Rusiye lagerine qarşı sanktsiyalar tayin etken edi.
